Конспект: “Уенчыклар илендә кунакта”

16.05.2014 | Автор: Ләйсән Сираева

2-3 яшьлек балалар өчен сөйләм телен үстерү буенча шөгыль конспекты

Максат.

1. Уенчыклар турында сөләм телләрен баету: кучак, аю, әтәч, паровоз, песи, машина һ.б . Аларны башка сүзләр белән бәйләргә өйрәтү: зур, бәләкәй, күп….

2. Хайваннар һәм җәнлекләр итеп ясалган уенчыкларны чакыра белергә , аларга хас билгеләрне әйтә белүне ныгыту.

3. Бәйләнешле сөйләмне үстерү һәм матут әдәбияткә, халык уеннарына мәхәббәт үстерү. Уенчыкларга сак караш тәрбияләү.

Җиһазлар: уенчыклар (аю, песи, машиналар, курчак, самолет, паровоз)

Шөгыль барышы:

– Хәерле көн! Балалар, кәефләрегез ничек? Урамда нинди матур кояшлы көн. Әйдәгез, без дә кояш кебек бер-беребезгә ягымлы итеп елмайыйк. (Елмаябыз) Сез елмайгач, бүлмәбез яктырып китте. Ә хәзер кояшта кулларыбызны җылытып алыйк инде.

Чәп, чәп, чәбәкәй,

Кулларыбыз бәләкәй.

Ә хәзер тизрәк,тизрәк

Чәбәклик күңеллерәк.

(Ишек шакыйлар)

– Балалар, бу кем икән? (Куян керә) Исәнме, куян! Әйдәгез куян белән бергәләп матур итеп исәнләшик.

– Куянкай, син кая юл тоттың?

Куян: – Мин сезне уенчыклар иленә чакырырга килдем. Анда бик матур уенчыклар күп, алар сезне көтә.

– Рәхмәт, куянкай, безне чакыруыңа. Балалар, барабызмы? Ә нәрсә белән барабыз?

Куян: Паровозга утырып барыйк, кузгалабыз.

Паровоз, паровоз

Без кунакка барабыз

Уенчыклар күрергә

Алар белән уйнарга.

– Менә килеп тә җиттек. Күрегез әле, күпме матур уенчыклар. Балалар, уенчыклар күпме?

– Күп.

– Әйдәгез ял итеп алык, утырышыйк. Мин сезгә хәзер табышмак әйтәм, ә сез миңа кайсы уенчык турында икәнен әйтерсез.

Ул иртүк тора

Матур итеп кычкыра.

– Әйтегез, әле бу кайсы унчык турында?

– Әтәч.

– Әйе. Әтәч ничек кычкыра? Ул нинди төстә? Аның нәрсәләре бар?……

– Балалар, монда аю да бар икән. Ул нинди? (Зур,йомшак…) Аның нәрсәләре бар? (Колагы, борыны, күзләре, тәпиләре….)

– Аюның безнең белән уйныйсы килә. Әдәгез бергәләп уйнап алабыз.

Аю килә лап-лап,

Үләннәрне таптап (әкрен генә килә).

– Аю, алай итмә син,

Безнең белән уйна син (аюга бармак яныйлар).

Урыныңда тик торма,

Тырып-тыпыр тыпырда (урында тыпырдыйлар).

Аю бик арган икән,

Тәмләп йокыга киткән (аю йоклый).

– Аю, әйдә, тор инде,

Тагын бер уйнык инде (аю уяна,куып китә).

(Песи тавышы ишетелә)

– Абау, бу нәрсә тавышы?

– Песи.

(Песи уенчыгын качырган җирдән алам, балалар белән карыйбыз)

– Песи нинди? (Матур, йомшак….) Ул зурмы әлә кечкенме? (Кечкенә)

Ул нәрсә ярата? (Сөт)

– Балалар, әйдәгез песекәй белән дә уйнап алабыз.

Песи, песи, песекәй

Песи әле бәләкәй,

Үзе мырлый да мырлый,

Әллә ул шулай җырлый.

Песекәй, песекәй, прәссссс (йомшак кына тәпиләренә сугабыз)

– Уенчыклар илендә машиналар да күп икән. Иң зур машина кайсы? Кечкенә машинаны алып килегез. (Бер бала алып килә)

– Паровоз кайда икән? (Бала йөртеп килә) Күрсәтегез әле, паровоз ничек йөри? (Күрсәтәләр)

– Ә бу уенчык ничек атала? (Самолет күрсәтәм)

– Самолет.

– Әйдәгез әле, без дә самолет кебек очып күрсәтәбез. (Самолет булуп күрсәтәбез)

Куян: – Балалар, мин сезгә үземнең иптәшемне алып килдем. Карагыз әле бу нәрсә? (Куян күрсәтә) Ул нинди төстә? (Күзләре, колаклары, тәпиләре турында сораулар бирә)

Куян: – Минем дә сезнең белән уйныйсым килә.

Уен “ Куянкай”

– Карагыз әле, балалар, монда курчаклар да күп икән. Әйдәгез алар белән уйнап алабыз. (Үчтеки иттерү)

– Балалар, мин сезгә курчакның нәрсәләре бар икәнен әйтәм ә сез күрсәтегез. (Балалар курчакта күрсәтәләр, кабатлыйлар )

– Ә сезнең куллар кая? Әйдәгез кулларны, аякларны яшереп уйнап алабыз.

Уен “Нәни куллар”

– Курчакларыбыз арыган, әйдәгез аларны бишек җыры җырлап йоклатыйк.

“Бишек җыры”

- Курчакларыбыз йокыга китте, тавышланырга ярамый. Тыныч кына “Без, без, без идек”не әйтик инде.

- Безгә китәргә вакыт, куянкай син безне озат инде. (Тезелешеп паровоз ясап чыгып китәбез)

Татарстан Республикасы

“Лениногорск муниципаль районы” муниципаль берәмлеге”