Конспект: “Алсуга кунакка”
Максат:
1. Сәламәт булыр өчен гигиена таләпләрен сакларга һәм үтәргә кирәклеген төшендерү;
2. Юыну ысулын дөрес итеп башкарырга күнектерү, ныгыту; бит, кулларны корытып сөртү; чиста, пөхтә йөрергә теләк уяту;
3. Балаларның сүзлек запасындагы: сабын, сөлге, су, тарак сүзләрен куллану;
4. Бер – береңә итәгатьле булырга кирәклеген аңлату; Алсу – курчакка кайгыртуларын, мәхәббәтләрен күрсәтү.
Материаллар: курчак, карават, карават җәймәләре, бәләкәй юынгыч, тарак, сөлге, сабын, күчтәнәчләр.
Эшчәнлек барышы:
– Балалар, безгә бүген бик күп апалар кунакка килделәр. Әйдәгез алар белән исәнләшик.
– Исәнмесез, хәерле иртә.
– Балалар, сезнең кәефләрегез ничек?
– Әйдәгез, бер – беребезгә елмаеп карыйк та, шушы яхшы кәефләребезне бер- беребезгә бүләк итик. Безгә бүген тагын бер кунак, Алсу килергә тиеш, ләкин ул нишләптер күренми, килмәскә булды микәнни. Әйдәгез, без үзебез аның янына барабыз. Ә тизрәк барып җитәр өчен безгә паровозга утырырга кирәк. Минем артка бер- бер артлы тезелеп бастык та, китттек. Чух- чух- чух- чух- чух……(массаж юлларыннан баралар) Килеп җитәбез, паровозны туктатырга кирәк. Ничек туктатабыз? Тссссссс, төшәбез.
Бишек көе яңгырый.
– Нинди көй бу, кем монда йоклый?
– Алсу, тор,тор. (Алсу тормый)
– Балалар, әйдәгез Алсуны уятабыз. Аяклар белән топ- топ- топ, куллар белән шоп- шоп- шоп.
– Балалар, Алсу күзен ачты, исәнләшик.
– Исәнме, Алсу.
– Алсу, тор инде, без синең яныңа кунакка килдек.
– Юк, минем торасым килми. Минем аякларымның да, кулларымның да бер дә йөрисе килми.
– Балалар, иртән йокыдан тиз уяныр өчен нәрсә ясарга кирәк? Без сезнең белән бакчага килгәч нәрсә эшлибез?
– Бер-ике-өч итәбез, зарядка ясыйбыз.
– Хәзер без сиңа ясап күрсәтәбез, син дә безнең белән яса.
(Балалар музыка ярдәмендә гимнастика ясыйлар: кулларга, аякларга)
– Ничек, Алсу, йокыңнан уяндыңмы, рәхәтме? Көн дә йокыдан торгач шушы күнегүләрне эшлә.
– Алсу, ә битең нәрсә эшләде? Балалар, карагыз әле Алсуның бите нәрсә эшләгән?
(Пычрак, юылмаган)
– Йокларга ятыр алдыннан нәрсә эшләргә кирәк?
– Юынырга.
– Алсу, син юынмадыңмени? Әллә юына да белмисеңме?
– Балалар, Алсуны юындырабызмы?
– Иң беренче нәрсәне юабыз? (Кулларны)
– Аннан? (Битне)
– Битне югач нәрсә эшлибез? (Сөлгегә сөртәбез)
– Сөлгегә сөртенгәндә бит, кулларны корытып сөртәбез һәм үзебезнең сөлгегә генә сөртенәбез.
– Ничек, Алсу, чиста булу сиңа охшыймы?
– Ә Алсу тагын да матур булсын өчен чәчләрен тарап, керешкә җыеп куйыик.
(Чәч тарыйлар, кереш куялар)
– Рәхмәт сезгә. Гимнастика ясап йокыдан уяттыгыз, юындырдыгыз, чәчләремне матурладыгыз.
– Балалар, Алсу сезгә охшыймы?
– Әйе.
– Алсу, без сине үзебездә кунакка көтәбез, сау бул. Балалар, паровозга утырабыз да, бакчага юл тотабыз. (Шул ук юл белән кайталар)
Татарстан Республикасы
Сарман муниципаль районы
“Гомуми үсеш төрендәге 2-нче санлы “Лилия” балалар бакчасы”
муниципаль бюджет мәктәпкәчә белем бирү учреждениесенең
I квалификацион категорияле тәрбиячесе
ИХСАНОВА РАУШАНИЯ МӨДӘРИС КЫЗЫ
Комментарии: |