Яңа фикерләр:

postheadericon Бармак уеннары – 5

Бармак уеннары белән уйнар алдыннан баланың уч төпләрен һәм бармакларын җиңелчә генә сыйпагыз. 2-3 күнегүне сайлап ясагыз да, тора-бара аларны яңалары белән алмаштырыгыз.

Хайваннар, кошлар

 1. Песи

1 песи

(Урта, атсыз һәм баш бармакларыгызны берләштереп сузыгыз. Бала да кабатласын.)

 

Мин – песи, песи, песи!

Йокларга бик яратам.

Көндез тәмләп йоклыйм да

төнлә тычканнар тотам. (Г.Корбановадан)

 

2. Тычкан

2 тычкан

(Урта һәм атсыз бармакларыгызны баш бармакка терәгез. Имән һәм чәнти бармаклаыгызрны бөкләгез – бу «колаклар».)

 

Мин тычкан, тычкан, тычкан!

Мәче абыйдан качам.

Кичә куды бер мәче,

Чаптым хәлем беткәнче. (Г.Корбановадан)

 

3. Ат

3 ат

(Уң кулыгызның баш бармагын өскә таба күтәрегез. Уң кулыгызга сул кулыгызны куегыз – бу «атның яллары».  Сул кулыгызның баш бармагын да өскә таба күтәрегез. Аннары кулларыгызны алмаштырыгыз.)

 

Чаба атым-тулпарым,

Ефәк төсле яллары.

Җилдәй бик тиз, җитез тай!

– Калма артта! И-һа-һай! (А.Әюпова)

 

4. Поши

4 поши

(Кулларыгызны баш өстенә чалыштырып салыгыз, бармакларыгызны аерыгыз. Күнегүдән соң кулларыгызны селкетеп алыгыз.)

 

Башында үсә куак –

Шуны табып куандык.

Бу җәнлек безгә ошый:

Исеме аның – поши.

 

5. Куян

5 куян

(Бармакларыгызны йодрыкка кысыгыз. Имән һәм урта бармакларыгызны өскә таба каратып селкетегез – бу «куянның колаклары». Бала да кабатласын.)

 

Ап-ак куян утыра,

Колакларын селкетә.

Менә шулай, менә шулай

Колакларын селкетә.

 

6. Бүре

6 бъре

(Уң кулыгызның баш бармагын бер якка авыштырыгыз. Имән бармагыгызны бөкләгез – бу «бүренең маңгае». Калган бармаклар – «бүренең казналыклары*».)

Казналыклар* – челюсти.

 

Мин – бүре, бүре, бүре!

Яшәсәм дә урманда,

бардым беркөн авылга,

каз, сарыклар урларга. (Г.Корбановадан)

 

7. Каз

7 каз

(Дүрт бармагыгызны кушыгыз һәм бөкләгез. Баш бармак – аларга параллель. Баш бармагыгызны аска-өскә селкетегез – «каз томшыгын ача һәм яба».)

 

Мин – ата каз, ата каз!

Муенымны сузам да

ысылдыйм да ысылдыйм,

яннан кеше узганда. (Г.Корбановадан)

 

8. Әтәч

8 этэч

(Имән бармагыгызны баш бармак белән берләштерегез – бу «томшык». Калган бармаларыгызны як-якка аерыгыз.)

 

Мин әтәч, әтәч, әтәч!

Очып коймага менәм.

Юк белмәгән һөнәрем,

мин күп һөнәрләр беләм:

 

таң атканда уянам,

көрәшәм, җырлыйм, биим.

Ләкин, тавыклар кебек,

йомырка сала белмим.  (Г.Корбановадан)

 

9. Торна

3 торна

(Кулларыгызның уч төпләрен үзегезгә таба каратып куегыз. Баш бармакларыгызны төпләгез – бу «торнаның башы», калган бармаклар – «канатлары». Кулларыгыз белән болгагыз.)

 

Салмак кына китеп бара

Торналар:

– Торыйк-торыйк.

Әйтәләр күк:

– Туган җирне

Тагын бер урыйк, урыйк. (Мөҗәһит)

 

Һава торышы

1. Кояш

52 кояш

(Кулларыгызның уч төпләрен алга таба каратып куегыз. Бармакларыгызны як-якка аерыгыз. Күнегүдән соң кулларыгызны хәлсезләндерегез һәм селкетеп алыгыз. Бала да кабатласын.)

 

Кояш булса, көн була;

Ул булмаса, төн була.

 

2. Яңгыр

51 янгыр

(1 вариант. Баштан бер кулыгызның бармаклары белән, аннары икенче кулыгызның бармаклары белән, соңыннан ике кулыгыз белән берьюлы өстәлгә шакыгыз – бу «яңгыр ява». Бала да кабатласын.

2 вариант. Балага: «Яңгыр ява. Баштан ул акрын гына тамчылый. Тып-тып-тып», – дип әйтегез һәм бармакларыгыз белән өстәлгә акрын гына шакыгыз. «Аннары ул көчлерәк ява башлый. Тып-тып-тып», – дип әйтеге һәм бармакларыгыз белән өстәлгә катырак шакыгыз. «Тагын акрын гына ява да туктый». Бала да кабатласын.)

 

Җәйге эссе көннәрдә

Яңгырны бик көтәләр.

Ул аз гына күренсә –

Качып-посып бетәләр.

 

 

Үсемлекләр

1. Чәчәк

41 чэчэк1   41 чэчэк2

(Кулларыгызны кушып өскә таба күтәрегез – бу «чәчәк бөресе». «Чәчәк ата» – кулларыгызны берьюлы як-якка аерыгыз, аннары тагын кушыгыз. Бала да кабатласын.)

 

Яз җитүен белдерә,

Былбылга шатлык бирә.

Күп төсле кием кия,

Бачаларга ямь бирә. (Табышмак)

 

2. Агач

42 агач

(Терсәкләрегезне өстәлгә куегыз. Бармакларыгызны як-якка аерыгыз. Кулларыгызны һәм бармакларыгызны селкетегез.)

 

Җәен киенә, кышын чишенә. (Табышмак)

 

 

Йорт җиһазлары

1. Йорт

23 йорт

(Ике кулыгызның бармак очларын берләштерегез. Уң кулыгызның имән бармагын өскә таба күтәрегез – бу «торба».)

 

2. Өстәл

22 эстэл

(Сул кулыгызны йодрыкка кысыгыз – бу «өстәлнең аягы». Аны уң кулыгыз белән каплагыз.)

 

Бигрәк чиста өстәл өсте,

Кайсы шундый остадыр?

Мин сөрткән идем шул аны –

Өстәл шуңа чистадыр. (Р.Миңнуллин)

 

3. Урындык

21 урындык

(Уң кулыгызның бармакларын өскә таба каратыгыз – бу «урындыкның аркасы». Аңа сул кулыгызның йодрыгын терәгез – бу «утыргыч»)

 

Аягы бар, кулы юк;

Урыныннан китә алмый. (Табышмак)

 

 

Көнкүреш әйберләре

1. Күзлек

31 кузлек

(Ике кулыгызның бармакларыннан түгәрәкләр ясагыз да күзләрегезгә терәгез. Бу – «күзлекләр».)

 

Кайда икәнен белми,

Әби күзлеген эзли.

Күзлеге бит кулында,

Әмма ул аны сизми. (Н.Мадъяров)

 

2. Шар

32 шар

(Ике кулыгызның бармак очларын берләштерегез. «Шарны кабартабыз»: кулларыгыз туп тоткан кебек булсын. «Шар шартлады». )

 

Шамил шарны кабартты,

Шар түзмәде, шартлады.

Шардан да зур шатлыгы

Бер мизгелдән артмады. (Мөҗәһит)

 

3. Кәрзин

34 кэрзин

(Бер кулыгызның бармакларын икенче кулыгызның бармаклары арасына кертегез. Баш бармакларыгызны берләштерегез – бу «кәрзиннең сабы».)

 

Кәрзинемне мин ботакка

Элгән идем урманда.

Кәрзинем дә, ботак та

Юк булды тик торганда. (Р.Миңнуллин)

 

 

ОХШАШ МӘКАЛӘЛӘР:

Бармак уеннары-1

Бармак уеннары-2

Бармак уеннары-3

Бармак уеннары-4

Мәкалә ошадымы? Дусларыгызга да сөйләгез:

Комментарии:

Оставить комментарий