Конспект: “Урманга сәяхәт”
Икенче кечкенәләр төркеме өчен физкультура уен эшчәнлеге
Алдан хәзерлек: урман һәм анда яшәүче хайваннар турында әңгәмә алып бару, төрле хәрәкәтле уеннар уйнау.
Ярдәмлек: гимнастик эскәмия, обручлар, уенчык эт, куян, “кояш”, урман аланы: агачлар, кошлар.
Уен эшчәнлегенең сруктурасы:
1 өлеш: йөрү, йөгерү, аяк очында йөрү.
2 өлеш: түгәрәккә басу.
Гомуми күнегүләр .
Төп күнегүләр:
– Гимнастик эскәмиядән дүрт аякланып йөрү .
– Обручлар аша атлап йөрү .
3 өлеш: Хәрәкәтле уен “Куян янына йөгерегез”.
Тыныч уен: “Куян юына”.
Йомгаклау өлеше .
Максат:
1. Балаларны йөрергә, йөгерергә өйрәтүне дәвам итү, пространсвода ориентлашуны камилләштерү, эскәмиядән дүрт аякланып йөрүне өйрәтү , обручлар аша атлап йөрүне ныгыту;
2. Уенга кызыксыну хисе уяту, үзлектән эш итүне үстерү;
3. Кыюлык , өлгерлек тәрбияләү.
Эшчәнлекнең барышы :
– Балалар, бүген без сезнең белән урманга барырбыз.
Эт килеп керә:
-Балалар, исәнмесез, мине дә үзегез белән урманга алып барыгыз әле.
Тәрбияче :
– Балалар, маэмайны үзебез белән алып барыйкмы ?
– Алып барыйк .
– Ярый, алайса маэмай да безнең белән барсын, юл иркен, киң, барыбыз да сыярбыз. Әйдәгез, кузгалыйк. (Йөрү, йөгерү ) Балалар, ояда кошлар утыра, әкрен генә барыйк (Аяк очында йөрү ) Менә аланга килеп тә җиттек. (Маэмайны уртага утырту)
1. Җил исә-исә-исә, агачларны селкетә :
Төп торыш: аякларны әз генә ачу, кулларны өскә күтәрү, уңга, сулга иелү (3әр тапкыр )
2.Урманда кошлар күп, менә алар ничек оча :
Төп торыш: куллар ян-якта, гәүдәне төз тоту, кулларны өскә һәм аска менгерү, төшерү (4-5 тапкыр)
3.Урманда зур һәм кечкенә агачлар үсә .
Төп торыш: гәүдәне төз тотып басу, куллар аста, чүгәләү (кечкенә), торып басу(зур) (4-5 тапкыр)
4. Әнә кояш чыккан икән бит, бигрәк күңелле буды.
Төп торыш: куллар билдә, 2 аякта сикерү .
5. Урман һавасы сулау: тирән итеп сулыш алу һәм чыгару (3тапкыр )
Төп хәрәкәтләр:
1. – Балалар , хәзер безгә су аша күпердән чыгарга кирәк, маэмаебыз безне күпернең аргы ягыннан карап торыр, ә без аңа карап чыгарбыз (Дүрт аякланып гимнастик эскәмиядән йөрү: 2 тапкыр)
2. Аланлыкта түмгәкләр бар, аларны атлап чыгарбыз : обручлар аша атлап йөрү. (2 тапкыр)
– Юлыбызны дәвам итик. (Юлдан бару һәм куян янына килеп чыгу). Әһә, менә кая яшеренеп ята икән куян, әйдәгез, куян белән уйнап алабыз.
Хәрәкәтле уен “Куян янына йөгерегез” (2-3 тапкыр уйнау )
- Куянның тагын сезнең белән уйныйсы килә.
3 өлеш. Тыныч уен : “Куян юына”
Куян юына,
Кунакка җыена:
Борынын юды, койрыгын юды,
Колагын юды һәм
Коры итеп сөртенде. (2 тапкыр уйнау)
-Балалар, безнең өйгә кайтыр вакыт та җиткән, куян белән саубуллашыйк (саубуллашу, тәпиен тоту ), маэмаебызны да ияртик.
– Балалар, урманда сезгә күңелле булдымы? Нәрсәләр күрдегез? Урманда без нәрсәләр эшләдек? (Балаларның тәэсирләре белән уртаклашу).
Татарстан Республикасы
Әлки муниципаль районы
“РОМАШКА” балалар бакчасы”
муниципаль бюджет мәктәпкәчә белем бирү учреждениесенең
I квалификацион категорияле тәрбиячесе
ЯРУЛЛИНА ЛИЛИЯ ӘНВӘР КЫЗЫ
Комментарии: |