Икмәк турында шигырьләр
Кояшның җылы нурларын,
Җир җылысын саклап үзендә,
Күкрәкләргә терәп кисәр икмәк
Һәр табынның тора түрендә.
***
Ипи басуда үсә,
Аннан амбарга күчә.
Аннары мичтә пешә,
Кызарып мичтән төшә.
***
Икмәк тәмле була.
Икмәк йомшак була.
Икмәк түгәрәк була.
Икмәк хуш исле була.
***
Менә табын түрендә
Гөбәдия күренә
Йөзе шат көлеп тора
Хуш ис бөркелеп тора.
***
“Табын яме – чәк-чәк” – дигән
Сүзләр йөри түгелме?
Һәрбер туйның иң түрендә
Урын ала түгелме?
***
Баллы чәк-чәккә күңеле
Күтәрелә кызларның.
Хәзер инде тыпыр- тыпыр
Биисе бар аларның.
***
Коймак пеште,
Табадан төште
Кунакларга сый-хөрмәт,
Якты чырай, такта чәй.
***
Табын түрен һәрчак бизи,
Майда пешкән кош теле,
Авыз итми һич китми
Килгән кунак, билгеле.
“Кунаклар җыры”
Без әзерлибез табын
Китереп бөтен ягын,
Уртага куйдык чәчәк,
Чәчәк янында чәк-чәк.
Бавырсак һәм кош теле
Ризыклар төрле-төрле
Сумса, бәлеш, өчпочмак
Гөбәдия һәм коймак.
Һәркемгә чыга өлеш,
Пар кыстыбый һәм бәлеш,
Җитешегез кунаклар,
Кыстатмагыз, кунаклар!
Өйгә кайтып китәргә,
Ашыкмагыз, кунаклар!
| Комментарии: |