Яңа фикерләр:

postheadericon Конспект: “Төсле ташлар”

ташЗурлар төркемендә танып-белү эшчәнлеге.

 

Максаты: балаларның ташлар турындагы танып белү, кызыксынучанлыкларын, интеллектларын үстерү, төрле ташлар белән таныштыру.

Тәрбия бурычы: ташларга карата кызыксыну уяту, соклану, тикшерү-эзләнү; табигатькә сак караш, мәхәббәт тәрбияләү.

Үстерү бурычы: бәйләнешле сөйләм телен, хәтерне, игътибарлылыкны логик фикерләү сәләтләрен үстерү.

Белем бирү бурычы: ташларның үзлекләрен аерырга өйрәтү (каты, нык, авыр, шома) характерлы билгеләре буенча ташларны сурәтли белү.

Интеграль белем бирү өлкәләре: аралашу, иҗади сәнгать, социальләштерү, музыка.

Методик алымнар һәм чаралар: уеннар, сөенеч мизгеле, практик эксперемент эшчәнлеге, сорау бирү, мактау, бәяләү.

Җиһазлау: мультимедия-проектор, төрле төрдәге ташлар.

Эшчәнлек төзелеше:

1. Психологик көйләү.

2. Сөенеч мизгеле.

3. Тикшерү-эксперемент.

4. Хәрәкәтле уен“Кояш”.

5. Фикер алышулар.

6. Музыкаль пауза.

7. Йомгаклау.

 

Эшчәнлек барышы:

Тәрбияче керә, кулына төенчек тоткан.

Тәрбияче: Ай, ай, ай, бик арыдым. Көч-хәл белән күтәреп килдем. Исәнмесез, балалар! Килегез әле яныма. Сезнең янга килгәндә җылы яктан кайткан кошлар миңа бер төенчек ташлап киттеләр бит. Күтәреп карагыз әле, авырмы?

– Әйе, авыр.

Анда ниләр бар икәнен беләсегез киләме?

– Беләсе килә.

– Минем дә беләсем килә. Әйдәгез, бергәләп ачып карыйбыз. (Тәрбияче төенчекне ачып җибәрә. Ә аннан кечкенә капчыклар килеп чыгалар)

– Ни икән соң бу?

– Ниндидер капчыклар.

– Мә әле, берсен сиңа бирәм, менә бу зурысы сиңа булсын (тәрбияче капчыкларны балаларга биреп чыга).

– Балалар, капчыкны капшап карагыз әле, минем капчыгым каты бит, сезнеке нинди?

– Нәрсәләр сизәсез? Кечкенә шакмак бар, әллә шикәр инде? Сезнеке нинди?

– Түгәрәккә дә ошаган, каты, төрле зурлыктагысы бар.

– Әйдәгез ачып карыйбыз. (Һәр бала үз капчыгын ачып карый)

– Капчыгыгыздан ниләр чыкты?

– Ташлар.

– Сезнең ташларны күргәнегез бар идеме соң?

– Бар.

– Кайсы җирдә күргәнегез бар?

– Урамда, юлда.

– Зур ташны алып күрсәтегез әле миңа?

– Ничек, авырмы?

– Авыр.

– Кечкенәләрен алыгыз хәзер. Кулга тоткач рәхәт булып китә.

Тәрбияче: Балалар өстәл янына килегез әле, карагыз, монда төрле зурлыктагы ташлар бар икән.

Һәр балага аерым савытларга салынып төрле зурлыктагы ташлар, лупа, салфеткалар куела.

– Бу таш нинди төстә?

– Кара, ялтыравыклы.

– Ул – таш күмер. Ә бу – елга ташлары. Әлеге ташларны елга ярларыннан алалар.

– Әлеге ташлар нинди, кайсыгыз әйтә?

– Алар төрле формада, төрле төстә, шома, матур.

– Хәзер күзләрегезне йомыгыз, кулыгыздагы ташлар турында ни әйтә аласыз?

– Йомры. Салкын, кытыршы, шомалары да бар.

– Төсе нинди?

– Кара кучкыл, яшел сыман, ачык төсләре дә бар.

– Менә бу таш җир астыннан чыга. Җирнең өске катламын алалар һәм таш чыга. Ул ташны зур тракторлар казып алалар. Бу ташның төсе нинди?

– Аксылт-сары.

– Ташның як-ягы нинди, елга ташыннан аерыламы?

– Аерыла. Алар зур, кырыйлары очлы.

– Нигә алай икән ?

– Судагы ташларны дулкыннар бер-берсенә бәреп йөртеп, аларны шомартып бетергәннәр.

– Менә сезгә пластилин. Чагыштырыгыз әле кайсы нинди?

– Пластилин йомшак, аннан төрле әйберләр әвәләп була. Ә таш каты, аны йомшартып булмый.

– Суга ташны салып карагыз әле, таш нишли?

– Су төбенә төшеп китә.

– Нигә төшеп китә икән ?

– Таш авыр, шуңа төшә.

– Лупа аша карыйк әле, таш нинди икән?

– Ташта кечкенә генә тишекләр бар.

 

– Күктә кояш елмая. Аның нурлары безгә юлдаш булсын, бергәләп кояш нурлары белән хәрәкәтләнеп алыйк әле. (Идән уртасында кояш, як-ягына нурлары сибелгән. Ленталарны алып хәрәкәтләнү.) Әйтегез әле миңа, кояшта таш нишли дип уйлыйсыз?

– Җылына.

– Ә салкында ?

– Суына.

– Кемнәрнең өйләре таштан, күзәтерсез әле, таш җылыны тышка чыгармый, салкынны кертми.

Кулларыгызга вак ташларны алыгыз, кыштырдатып карагыз, бер-берсенә бәрелеп тавыш чыга. Хәзер менә бу шешәләргә вак ташларны тутырабыз, капкачын борып куябыз. Уртага чыгып тезелеп басабыз, оркестр ясыйбыз.

 

Әпипә көе уйнала, балалар шалтыравыклар белән уйныйлар.

– Менә нинди яхшы, оста уенчылар икән сез. Рәхмәт сезгә.

 

Йомгаклау.

– Балалар, ташлар ни өчен кирәк?

– Йортлар төзер өчен, юллар ясар өчен.

– Ташлар нинди үзлекләргә ия булды инде?

– Ташлар – нык, авыр, тотрыклы, чыдам, каты, төрле формадагы ТӨРЛЕ ТӨСТӘГЕ МАТЕРИАЛЛАР.

– Табигатебез искиткеч бай, матурлыкны күрә белергә, яратырга кирәк.

 

Татарстан Республикасы

Әтнә муниципаль районы

“Күәм балалар бакчасы”

муниципаль бюджет мәктәпкәчә белем бирү учреждениесенең

I квалификацион категорияле тәрбиячесе

ФАЗЫЛҖАНОВА ГӨЛНАР ГОСМАН КЫЗЫ

Мәкалә ошадымы? Дусларыгызга да сөйләгез:

Комментарии:

Оставить комментарий