Электрон китаплар
бүлектә мин балалар өчен кызыклы китапларга сылтамалар бирермен. Китапларны онлайн уку һәм конспектлау өчен www.tatknigafund.ru сайтында теркәлергә кирәк.
1. “Нәниләр тел өйрәнә”, Т.Шакирова, Татарстан китап нәшрияты , 2010
Бу төсле рәсемнәргә бай сүзлек мәктәпкәчә балаларга тел өйрәтү максатында чыгырылган. Китапта, тематик төркемнәргә бүлеп, нигездә предметлы рәсемнәр һәм аларның татарча, русча, инглизчә атамалары бирелгән.Шулай ук темага бәйләнешле рәсемсез сүзләр, фразалар, үрнәк сораулар һәм җаваплар да бар.
2. “Кошлар: табигатькә сәяхәт”, Т.Шакирова, Татарстан китап нәшрияты, 2007
Әлеге китап «Табигатькә сәяхәт» сериясеннән беренчесе. Серле табигатебезгә ямь бирүче канатлы дусларыбыз — кошлар хакында ул китап. Анда төсле буяулар белән һәр кошның рәсеме бирелгән. Шул рәсемнәргә карап, сез кошларны танырга өйрәнерсез, матурлыкларына карап сокланырсыз. Кошлар хакында язылган хикәя-текстларны укып, аларның яшәү рәвешләре: кайда, ничек кышлаулары, ничек итеп оя ясаулары, балаларын тәрбияләүләре; табигатькә һәм кешеләргә файдалары хакында мәгълүмат алырсыз.
3. «Рәсем ясарга өйрәнәбез», Э.Нигматуллина , Татарстан китап нәшрияты , 2010
Рәсем ясарга өйрәнү ул әле карандаш белән кәгазь битен чуарлау гына түгел, моның өчен хыялланырга, күзәтә һәм күрә белергә дә кирәк. Китапта төрле материаллар һәм алар белән эшләү тәртибе хакында тулы мәгълүмат бирелгән. Рәсем ясарга өйрәнү өчен махсус күнегүләр дә бар.
4. “Балачак энциклопедиясе”, Беренче китап, Т.Шакирова, Татарстан китап нәшрияты , 2009
5. “Юл хәрәкәте билгеләре”, Т.Шакирова, Татарстан китап нәшрияты , 2009
Китап гаиләдә, балалар бакчасында, гомуми урта белем бирү мәктәпләренең башлангыч сыйныфларында ата-аналар, тәрбияче яисә укытучы җитәкчелегендә юл хәрәкәте билгеләрен өйрәнү өчен мәктәпкәчә һәм кече яшьтәге мәктәп балаларына атап чыгарыла. Җыентыкта юл хәрәкәте билгеләре һәм кагыйдәләре төрле рәсемнәр, мавыктыргыч ысуллар белән аңлатыла. Китапта шулай ук ЮХИДИ, транспорт төрләре, беренче светофорлар турында белешмә, юл хәрәкәтенә бәйләнешле терминнарның аңлатмалары, балаларның логик фикерләүләрен үстерү максатыннан сораулар һәм җаваплар, урамда яки җәмәгать транспортында үз-үзеңне тоту кагыйдәләре дә бирелә.
| Комментарии: |