Сабыем

Баланы төсләр белән 1 яшьтән соң таныштыра башларга була. Мин кызыл төстән башларга киңәш итәр идем. Сабыйны өйрәткәндә: “Бу кызыл туп”, – дип түгел, ә: “Бу туп. Ул кызыл төстә”, – дип әйтегез.

 

Яңа төсләрне кертергә ашыкмагыз. Бала бер төсне үзләштергәч кенә сары, кызгылт-сары, зәңгәр, яшел, шәмәхә, ак, кара, көрән төсләрен акрынлап кертегез.

 

Төсләрне өйрәнү өчен эре мозайка, манара (пирамидка), конструктор, шакмаклар, фломастерлар, карандашлар яхшы чара булып торалар. Баланы киенгәндергәндә-чишендергәндә дә аның киемнәренең төсләрен атагыз.

 

 

 Төсләр өйрәнәбез (З.Төхвәтуллина)

Сары була чебиләр,

Лимон була сап-сары.

Сары төскә буялган

Машинам да бар тагын.

 

Җиләк була кып-кызыл,

Мичтә кызыл ялкын да,-

Ул пешерә.

Ни өчен

Бит кызара салкында?

 

Кызгылт-сары төс ала

Кояш чыкканда һава.

Таң ата – кояш байый,

Дөньяга алтын ява!

 

Яшел була яфраклар.

Үлән дә яшел була.

Түтәлләрем ямь-яшел

Кыярлар белән тула.

 

Кызгылт – сары буяуга

Тамызсаң яшел төсне,

Аннан бераз бутасаң,

Көрән була, чәч төсле.

 

Зәп-зәңгәр күл өстендә

Оча зәңгәр күбәләк!

Их, шул күбәләк белән

Очсаң иде бергәләп!

 

Күк йөзендә биектә

Ак болыт йөзеп йөри.

Ап-ак болыт өстендә

Самолет кына гөжли.

 

Кара булганга карга

Кычкыра: “Кар – кар!” – диеп, –

“Минем кара җир өстендә

Эшлиселәр бар ”, – диеп.

 

1,5 яшьтән соң предметларны төс буенча җыю уеннарын оештырырга була.

 

1нче уен: “ Курчакларга бүләк өләш”

Түбәндәге рәсемгә басып компьютерыгызда саклагыз, принтер аша каты кәгазьгә чыгарыгыз һәм кисегез.

Баштан балага 3 курчакны күрсәтегез. “Кара әле, бу курчакның күлмәге һәм туфлие кызыл, бу курчакныкы – сары, ә бусыныкы – зәңгәр күлмәк һәм зәңгәр туфли”. Аннары: “Ә миндә тагын кулчатырлар да (зонтик) бар!”, – дип кулчатырларны баланың алдына куегыз. Кызыл курчакның күлмәгенә күрсәтеп: “Бу курчакның күлмәгенә нинди кулчатыр туры килә? Ә бу курчакка кайсысын бирәсең, ә бусына…”. Баланы дөрес җавап биргән өчен мактагыз. Кулчатырларны җыеп алып бутагыз – бәләкәчегез үзе аларны курчакларга өләшсен.

Киләсе юлы уйнаганда курчакларга кулчатырлар, сумкалар, байраклар  бирегез.

Бала 3 курчакка да бу әйберләрне өләшергә өйрәнгәч, кунакка яшел күлмәк кигән дүртенче курчак килсен.

 

2нче уен: “Минеке төсле квадрат тап”

Түбәндәге рәсемгә басып компьютерыгызда саклагыз, принтер аша каты кәгазьгә чыгарыгыз һәм кисегез.

Квадратларны кисеп  2 матур капка (пакет) салыгыз. Һәр капта дә 5 квадрат булсын: кызыл, сары, зәңгәр, яшел, шәмәхә.

Бер капны балага уенчык куян алып килеп бирсен. Куян: “Бу капларда нәрсәләр бар микән?” Үзегезнең каптан сары квадратны алыгыз. “Бу квадрат. Ул сары. Ә хәзер син дә үзеңнең кабыңнан нәкъ шундый квадратны тап”. Әгәр бала сары квадрат урынына бүтән төсле квадрат алса, аны үзегезнең квадрат янына куегыз да: “Бу сары түгел”, – дигез. Икенчесен чыгарып карасын.  Әгәр биремне дөрес үтәсә, баланы мактагыз. Аның квадратын үзегезнеке янына куегыз да: “Әйе, бу квадрат минеке төсле.”

Бу уенны күп мәртәбә уйнарга була.

Киләсе юлы турыпочмаклар, түгәрәкләр яисә өчпочмаклар белән уйный аласыз.

Мәкалә ошадымы? Дусларыгызга да сөйләгез: