Конспект: “Туган көн”
Мәктәпкә әзерлек төркеме
Максат:
Рус милләтеннән булган балаларны йорт кошлары һәм хайваннар белән таныштыруны дәвам итү; хайваннарны, кошларны тавышларыннан танып дөрес итеп атап бирергә өйрәтү һәм алар турында сөйләү күнекмәләрен камилләштерү; төсләрне кабатлау; сүз һәм сүзтезмәләрне диалогта сөйләшүне ситуациягә карап аңлап куллануларына ирешү.
Бурычлар:
- Күмәк уеннарда, диалогта актив катнашуларына ирешеп, өйрәнәсе сүзләрне уен аша истә калдыруларына ярдәм итү.
- Балаларны үзара дус, яхшы мөнәсәбәттә булырга өйрәтү һәм аларда бер – берсенә хөрмәт хисләре тәрбияләү.
- Диалог төзеп сөйләгәндә сөйләм әдәбе кагыйдәләрен камилләштерү.
Җиһазлау:
- уенчыклар: әтәч, үрдәк, тавык, песи, тычкан;
- интерактив тактада кызыл, яшел, зәңгәр, сары тәлинкәләр, чынаяклар;
- аудиоязма.
Ысуллар һәм алымнар:
- әңгәмә;
- уен;
- сүзле һәм күрсәтмә тысуллар;
- музыка.
Алдан әзерләнгән эш:
- Интерактив тактада төсле чынаяк, тәлинкәләрне, әтәч, тавык, үрдәкне карау;
- “Әкият илендә” (№ 29) күрсәтү;
- “Чукмар белән Тукмар” һәм “Сертотмас үрдәк” анимацион күренешен күрсәтү, эчтәлекләре буенча әңгәмә уздыру.
Эшчәнлек төзелеше:
- Кереш, бәйрәмчә кәеф булдыру.
- Бүләкләрне атау һәм бүләк итү.
- Сүзле – хәрәкәтле уен уйнау.
- Интерактив тактада төсле чынаяк, тәлинкәләрне карау.
- Тәрбияче белән балалар арасында диалог.
- Бала белән бала арасында диалог.
- Җырлап автобуста паркка бару.
- “Таны һәм әйтеп бир” уенын уйнау.
- Җырлап автобуста кайтып китү .
Эшчәнлек барышы.
(Балалар бүлмәдә уйныйлар, матур күлмәк кигән кыз бала (Лена) керә)
Балалар:
– Исәнме, Лена, син матур күлмәк кигәнсең, синең бүген бәйрәм мәллә?
– Исәнмесез. Бүген минем туган көнем. Туган көнгә килегез.
– Рәхмәт, киләбез.
Тәрбияче:
– Уенчыкларны урыннарына алып куегыз, балалар. Туган көнгә барырга әзерме сез?
– Әйе, әзер.
(Балалар, бер – бер артлы тезелеп басалар, “туган көнгә” баралар, җырлыйлар).
Туган көнгә барабыз,
Ленага бүләкләр алабыз,
Төрле-төрле уенчыклар
Ленага алып барабыз.
Өстәлдән уенчыклар алалар: үрдәк, әтәч, тавык, песи,тычкан.
(Лена кунаклар каршылый)
– Исәнмесез, кунаклар. (Кергән һәр бала бүләк бирә)
Рома:
– Исәнме, Лена. Сиңа бүләк – үрдәк.
– Рәхмәт, Рома. Үрдәк зур, матур, чиста.
Алеша:
– Исәнме, Лена. Сиңа бүләк – әтәч.
– Рәхмәт, Алеша. Әтәч зур, матур, чиста.
Ирина:
– Исәнме, Лена. Сиңа бүләк – тавык.
– Рәхмәт, Ирина. Тавык зур, матур, чиста.
Ваня:
– Исәнме, Лена. Сиңа бүләк – песи.
– Рәхмәт, Ваня. Песи кечкенә, матур, чиста, йомшак.
Денис:
– Исәнме, Лена. Сиңа бүләк – тычкан.
– Рәхмәт, Денис. Тычкан кечкенә, матур, чиста.
Лена:
– Бүләкләр матур, рәхмәт.
Тәрбияче:
– Лена, кунаклар сиңа матур уен да алып килделәр. Балалар, бергәләп уйнап алыгыз. Түгәрәккә басыгыз.
Туган көнгә бүләк иттек
Бик матур үрдәк. (Балалар үрдәк булып йөриләр һәм кабатлыйлар)
Бак-бак-бак-бак . .
Бүләк иттек без әтәч (Балалар әтәч булып йөриләр һәм кабатлыйлар)
Кикрикүк, кикрикүк,
Йокыдан тора иртүк.
Бүләк иттек без тавык (Балалар тавык булып йөриләр һәм кабатлыйлар)
Йөри ул авып- авып: кыт-кыт-кытак.
Бүләк иттек без песи (Балалар песи булып йөриләр һәм кабатлыйлар)
Мияу, мияу, мияу, ул шаян – тырный
Аннан котылып булмый.
Бүләк иттек без тычкан (Балалар тычкан булып йөриләр һәм кабатлыйлар)
Пи-пи-пи-пи
Куркып кына бара ул
Песидән качып йөри.
Лена:
– Уен матур, күңелле булды, рәхмәт.
Тәрбияче белән бала арасында диалог.
– Балалар, экранга карагыз әле. Нинди матур төсләр күрәсез?
Балалар:
– Кызыл, сары, яшел, зәңгәр.
– Дөрес әйттегез, ә нәрсәләр күрәсез ?
Балалар :
– Тәлинкә, чынаяк.
– Алеша, бу нинди чынаяк, нинди тәлинкә?
– Бу яшел чынаяк, яшел тәлинкә.
– Әйе, Ваня, ә бу нинди чынаяк, нинди тәлинкә?
– Бу зәңгәр чынаяк, зәңгәр тәлинкә.
– Әйе, Ирина, ә бу нинди чынаяк,нинди тәлинкә?
– Бу сары чынаяк, сары тәлинкә.
– Әйе, Рома, ә бу нинди чынаяк, нинди тәлинкә?
– Бу кызыл чынаяк, кызыл тәлинкә.
– Бик дөрес җавап бирдегез.
Тәрбияче Ленага:
– Лена кунакларны чәй эчәргә чакыр.
Лена:
– Кунаклар, рәхим итегез, чәй эчәргә утырыгыз.
(Балалар өстәл артына утыралар. Өстәл өстендә уртада өчпочмак)
(Балалар арасында диалог)
Рома:
– Денис, мә кызыл чынаяк, кызыл тәлинкә.
– Рәхмәт, чынаяк матур, кызыл, тәлинкә матур, кызыл.
Денис:
– Алеша, мә яшел чынаяк, яшел тәлинкә.
– Рәхмәт, чынаяк матур, яшел, тәлинкә матур, яшел.
Алеша:
– Ваня, мә зәңгәр чынаяк, зәңгәр тәлинкә.
– Рәхмәт, чынаяк матур, зәңгәр, тәлинкә матур, зәңгәр.
Ваня:
– Ирина, мә сары чынаяк, сары тәлинкә.
– Рәхмәт, чынаяк матур, сары, тәлинкә матрур, сары.
Ирина:
– Лена, әйдә, утыр, мә кызыл тәлинкә, кызыл чынаяк.
– Рәхмәт, тәлинкә матур, кызыл, чынаяк матур, чынаяк кызыл.
Лена:
– Бу – өчпочмак, ашагыз. Тәмле булсын.
Балалар :
– Рәхмәт, өчпочмак тәмле.
Лена:
– Чәй тәмле, чәй эчегез.
Балалар:
– Рәхмәт, чәй тәмле.
Тәрбияче:
– Денис, бу нәрсә?
– Бу өчпочмак.
– Өчпочмак нинди?
– Өчпочмак тәмле.
Денис:
– Алеша, өчпочмак тәмле (ме)?
– Өчпочмак бик тәмле.
Алеша:
– Ваня, чәй тәмле (ме)?
– Чәй бик тәмле.
Ваня:
– Ирина, синең чынаяк матур (мы)?
– Бик матур, кызыл чынаяк.
Ирина:
– Рома. Синең тәлинкә матур (мы)?
– Бик матур, яшел тәлинкә.
(“Чәй эчеп бетергәч” балалар Ленага рәхмәт әйтәләр)
– Лена, бик зур рәхмәт, чәй тәмле булды, өчпочмак тәмле булды (дип һәр бала әйтеп чыга).
– Яхшы, сезгә дә рәхмәт. Әйдәгез, парка барабыз.
“Автобуска утыралар”, паркка барганда җырлыйлар.
Без барабыз, барабыз,
Әй, сез безгә карагыз.
Рәхәтләнеп уйнарга
Паркка без барабыз.
(“Чирәмлектә” ярымтүгәррәк булып тезелеп басалар)
Тәрбияче:
– Балалар, мин сезне “ Таны һәм әйтеп бир” дигән уен уйнарга чакырам. Мәсәлән, беренче бала борылып баса, икенче бала “бак-бак” ди. Ә беренче бала аның нәрсә һәм нинди булуын әйтеп бирер.
– Уенны башлыйбыз. Рома, син әйтәсең, ә Алеша аны тавыштан танып әйтеп бирер.
Рома:
– “Пи-пи-пи”
Алеша:
– Бу тычкан.
– Әйе, бу тычкан.
– (Алеша борылып баса, тычканны кулына ала) Тычкан кечкенә, матур. (Шул тәртиптә әтәч, үрдәк, песи,тавыкны балалар әйтеп чыгалар)
Тәрбияче:
– Балалар, паркта сезгә ошадымы?
– Әйе, ошады.
– Ә хәзер барыбызга да өйгә кайтырга вакыт . “Автобус”ка утырабыз. Җырлый – җырлый кайтып китәләр.
Автобуста барабыз,
Әй, сез безгә карагыз.
Җырлый, җырлый,җырлый
Өйгә кайтып барабыз.
(“Автобустан төшәләр, бер – берсе белән саубуллашалар)
Балалар:
– Сау бул, Лена. Туган көн әйбәт булды.
Лена:
– Рәхмәт. Сау булыгыз.
Татарстан Республикасы
Казан шәһәре Идел буе районы
«342 нче катнаш төрдәге балалар бакчасы”
муниципаль автономияле мәктәпкәчә белем бирү учреждениесенең
тәрбиячесе
ХӘЙБУЛЛИНА МӘДИНӘ ӘХӘТ КЫЗЫ