Сабыем

2-3 яшьлек балалар өчен

 

Максат:

– гендер тәрбиясе бирү;

– балаларның акыл үсешен ачу;

– яшьтәшләре һәм өлкәннәр белән дус аралашырга өйрәтүне дәвам итү.

 

 

Бурыч:

Танып-белү үсеше өлкәсендә

-балаларның ишетеп, күреп, тоеп кабул итүен, күзәтүчәнлекләрен, логик фикерләү сәләтен үстерү, әйләнә-тирәдә югалып калмау;

Социаль-коммуникатив үсеш өлкәсендә

-баланың өлкәннәр һәм яштәшләре белән иркен аралашуына ирешү, әдәп-әхлак кагыйдәләрен өйрәтүне дәвам итү;

Сөйләм үсеше өлкәсендә

-сүз байлыгын үстерү, тулы җөмлә белән җавап бирергә гадәтләндерү, матур әдәбиятка кызыксыну уяту, ихтыярый истә калдыру сәләтен үстерү;

Эстетик үсеш өлкәсендә

-сәнгатьле сөйләм теле тәрбияләү, балаларда күтәренке кәеф булдырү, музыкаль сәнгатькә тарту, кызыксындыру;

Физик үсеш өлкәсендә

-баланың физик һәм психик сәламәтлеген саклау, ныгыту, балаларның уен эшчәнлеген үстерү, баету.

 

Җиһазландыру: сюрпризлы капчык (тарак, машина, руль, браслет, пистолет, бантик) энә-җеп, чүкеч, курчаклар.

 

 

Шөгыль барышы:

Тәрбияче:

Бергәләп басыйк әле,

Түгәрәк ясыйк әле,

Кемнең күлмәге кызыл,

Уртага чыксын әле,

Биеп күрсәтсен әле.

Малай, кыз парлашып әйләнәләр. Кызлар бер якка, малайлар икенче якка тезелеп басалар.

 

Уен « Танышабыз».

Малайлар каршыларында басып торган кызлар исемен, ә кызлар малайларның исемнәрен әйтәләр.

Тәрбияче:

– Уйнап алдык, биеп алдык. Ә хәзер мин сезне кунакка чакырам, барабызмы, балалар? Кунакка бүләксез бармыйлар бит, әйме? Үзебез белән бүләк тә алыйк.

– Хәерле юл безгә, балалар! Автобустагы урыннарыбызны алыйк, киттек. (Музыка астында биеп баралар)

 

– Балалар, безне кемнәрдер каршылый. Танышабыз. Курчак Гүзәл белән Марат бүлмәләренә керәбез. Без килгәнне көтеп озак уйнаганнар, әйберләрен бутап бетергәннәр. Әйдәгез дөреслик әле.

 

Уен «Кемгә – нәрсә?»

– Молоцы, булдырдыгыз! Ә хәзер алып килгән бүләкләрне бирик. Мин табышмак әйтәм, ә сез җавабын табып бүләкне кемгә бирергә икәнен әйтерсез.

 

1. Очлыдыр үзе.

Бар аның күзе.

Күлмәк тә тегә,

Чигү дә чигә. (Энә)

 

2. Әти кулына ала,

Тук-тук-тук

Кадак кага.(Чүкеч)

 

Чүкеч, энә-җеп турында аңлату. Гүзәлгә-энә-җеп. Маратка-чүкеч бүләк ителә.

 

Курчаклар рәхмәт әйтеп безне уенга чакыралар. Уен «Песи һәм чыпчыклар» дип атала. Кызлар да, малайлар да кошлар була. Кыз чыпчыклар кызыл ояга, малай чыпчыклар сары ояга җыела.

– Булдырдыгыз, балалар! Һай, сез нинди өлгерләр һәм җитезләр!

Динамик пауза. Түгәрәкләнеп утыралар.

Балалар, сез уйнарга яратасызмы?

– Әйе.

-Уеныбыз «Ничек яшисез?» дип атала. Минем сорауларга хәрәкәт белән генә җавап бирәсе.

– Ничек яшисез?

– Ничек йөзәсең, йөгерәсең, сикерәсең, йоклыйсың, уянасың, җиләк җыясың?

– Без бик күп уйнадык, шаярдык, эшләдек. (Һәр эшләгән эш балалар ярдәме белән санап үтелә) Сезгә рәхәт булдымы?

 

Бала еламсыраган тавыш ишетелә башлый.

– Ай,яй,яй! Марат белән Гүзәл арганнар, көйсезләнәләр. Әйдәгез, сезне кечкенә вакытта әти-әниләрегез юаткан кебек, аларны тынычландырыйк, йоклатыйк.

Балалар «Бишек җырын» җырлап бәбәйләрен (һәрберсе бәбәй тоткан кебек кулын тота) йоклаталар.

– Аларны кроватьларына салыйк. Үзебезгә дә кайтырга вакыт. Өйләрегезгә кайткач та кунакта ниләр күргәнне сөйләргә онытмагыз. Уеннарын да бергәләп уйнарсыз, яме.

 

Татарстан Республикасы

Сарман муниципаль районы

“Сарман 1 нче «Кояшкай» балалар бакчасы”

муниципаль бюджет мәктәпкәчә белем бирү учреждениесенең

тәрбиячесе

ХАКИМУЛЛИНА СӘРИЯ ФӘЙЗРАХМАН КЫЗЫ

Мәкалә ошадымы? Дусларыгызга да сөйләгез: