Фольклордан: баланы “үчти-үчти” сикерткәндә
Халык авыз иҗаты:
Минем кызым дәү кебек,
Бакчадагы гөл кебек.
Ике күзе янып тора,
Кара бөрлегән кебек.
***
Минем балам бал кебек,
Сыгылып торган тал кебек,
Авызы-борыны уймактай,
Өсте утырган каймактай.
***
Кызым, кызым, кыз кеше.
Кызыма килгән йөз кеше,
Йөз кешенең арасыннан
Сайлап алыр бер кеше.
***
Үчти-үчти, үчтеки,
Үсмәгәнгә кечтеки,
Үсә-үсә зур булыр,
Бигрәк матур кыз булыр.
***
Бигрәк матур, күз тимәсен,
Кемгә охшаган, кем төсле.
Утырадыр бишегендә
Ал чәчкә аткан гөл төсле.
***
Үчти-үчти, аппагым,
Иң яраткан такмагым.
Үчти-үчти (Р.Харис)
Үчти-үчти үчтеки,
Үсте китте кечтеки.
Үсте-үсте – зур булды,
Таза һәм матур булды,
Акыллы, зирәк булды,
Һәркемгә кирәк булды.
| Комментарии: |