Фольклордан: баланы уятканда
Халык авыз иҗаты:
Тор, тор, тургай,
Таң, таң ата бугай,
Тургай, кил, чыпчык, чык,
Чырык, чырык, чырык!
***
Йә, сандугач, күзең ач,
Тәрәзәдән, тургай, кач!
***
Таң, таң ата, таң ата,
Сагышлы ай да бата.
Кояш нурына күмелеп,
Бәбкәем йоклап ята.
***
Үтеп китте кара төн,
Алда-якты, матур көн.
Бәхетле булсын таңың,
Әйдә, балам, уйнап-көл!
***
Уян, балам, тиз уян,
Качып китте төн-куян.
Йомшак кына чәчләреңнән
Сөеп, иркәләп куям.
***
Чәчләрең камыш булсын,
Гәүдәләрең – зифа тал.
Кояш белән бәхет килә,
Таң нурларын күреп кал.
***
Алтын, алтын, алтыным,
Минем йөрәк ялкыным.
Уян, бәбкәм, күз нурым,
Кояш булып балкырмын.
***
Төн пәрдәсе ачылды,
Якты нурлар чәчелде.
Тор, балакай, битең ю,
Тарап алчы чәчеңне.
***
Тор, тор, кызым, тор инде,
Йокың туйгандыр инде.
Син яраткан курчакларың
Күптән торганнар инде.
***
Чырык, чырык, тургай,
Тәрәзәмә кунмый;
Бер кечкенә кошым бар,
Алып чыгып булмый.
***
Гөр-гөр, гөлдергү
Гөрләр күгәрчендер бу.
Күгәрчен авызыннан (Х.Сәлимов)
– Гөлдергү, гөлдергү,
Бигрәк чибәр, кемдер бу?
Тарап үргән чәчләре,
Өсте-башы бик ару.
– Гөлдергү, гөлдергү,
Бер әдәпле кыздыр бу,
Мәктәп дигән бакчада,
Чәчәктер бу, гөлдер бу!
Шигырь – Күгәрчен авызыннан. Х.Сәлимов
| Комментарии: |