Сабыем

3-4 яшьлек балалар өчен

“Аралашу” белем бирү өлкәсе (сөйләм үстерү)

  

Максат: Халык авыз иҗаты аша балаларның сөйләмен үстерү. Бишек җырлары, бармак уеннары өйрәтүне дәвам итү. Ә – авазын дөрес әйтүне ныгыту.  Татар халкына гына хас кунакчыллык хисләре тәрбияләү.

Җиһазлау: курчаклар, бишек, “Серле тартма”, бармак театры.

Сүзлек өстендә эш: тирбәтеп, бишек сүзләре.

 

Барышы:

Тәрбияче әни роленә керә.

– Балалар, бүген безгә кунакка бик күп курчаклар килгән. Менә сез өйләрегездән үзегезнең яраткан курчакларыгызны балалар бакчасына кунакка алып килдегез.

– Исәнләшик әле.

– Исәнмесез, курчаклар.

 

Табышмак әйтү.

Минем белән уйныйлар,

Кулларыннан куймыйлар.

Иркәлиләр, сөяләр,

Йокла, бәбкәм, дияләр.

 

– Курчак.

 

– Балалар, кунакка барганда без сезнең белән матур күлмәкләр киябез, чәчләребезне матурлыйбыз. Менә безнең курчакларыбыз да матур күлмәкләр кигәннәр, әйдәгез әле, аларның күлмәкләренең төсләрен әйтеп карыйк әле.

(Берничә баладан төсләрен әйттерү.)

– Балалар, курчаклар алҗаганнар, аларның йокылары килгән, әйдәгез, без аларны бишек җыры җырлап яратып йоклатабыз.

– Ә нәрсәгә салып йоклатабыз?

– Коляскага, караватка.

– Балалар, элек бәбиләрне бишеккә салып тирбәтеп йоклатканнар. (Балаларга бәләкәй бишек күрсәтү.) Бишекне әкрен генә тирбәтергә кирәк. (Бергәләп тирбәтеп, бишек дигән сүзләрне балалар белән кабатлау. Бишек җыры җырлап, тирбәтеп йоклату.)

 

Әлли- бәлли, бәбкәсе,

Кая киткән әңкәсе.

Каенлыкка җиләккә

Бәбиенә бүләккә.

Ә-ә-ә итә, курчагым йоклап китә.

Курчаклар йоклап китте, ә без тып- тын гына утырабыз. Менә курчакларны уятыр вакытта җитте. Әйдәгез, сезгә әниләрегез нинди матур сүзләр әйтеп йокыдан уяталар.

 

– Матурым, алтыным, йомшагым, акыллым һ.б.

Без дә сезнең белән йокыдан торып карыйк әле.

 

Физ. минутка.

Иртән иртүк торабыз,

Битне, кулны юабыз.

Тешләрне чистартабыз,

Бигрәк матур булабыз.

 

“ Серле тартма” алып керү.

Тартма эчендә бармак театры. Анда гаилә әгъзалары. Бармакларга киеп, бармак уены уйнау.

 

Бу бармагым – бабаем,

Бу бармагым – әбием,

Бу бармагым – әтием,

Бу бармагым – әнием,

Бу бармагым – бәбием.

 

Хәзер русчасын уйнап алыйк.

Этот пальчик – дедушка,

Этот пальчик – бабушка,

Этот пальчик – папочка,

Этот пальчик – мамочка,

Этот пальчик – я.

 

Менә без якын кешеләребезне яратып, якын итеп ничек матур итеп әйтеп бирдек. Чыннан да якын кешеләребезне яратырга, аларның сүзләрен тыңларга кирәк икән.

 

“ Ике кыз” әкиятен сөйләү.

Әкият буенча фикер алышу.

– Кайсы кыз әйбәт, кайсы кыз начар?

– Сез кайсы кыз кебек булыр идегез?

Балаларның җаваплары тыңлана.

 

Курчакларны уртага куеп түгәрәккә басу.

– Балалар, кунаклар килүгә әниләрегез нинди тәмле ризыклар пешерәләр әле?

– Бәлеш, кыстыбый, өчпочмак, коймак һ. б.

 

Хороводлы уен: “Кунаклар”.

Ямьле бәйрәм көн иде,

Без чакырдык кунаклар,

Кунакларның килүенә

Без пешердек коймаклар,

Чыш-пыш итте коймаклар,

Пеште-пеште коймаклар.

Сыйланыгыз кунаклар.

 

-Балалар, безгә бүген кунакка кемнәр килде әле?

-Курчаклар.

-Без аларны яратып нинди җыр җырладык әле?

-Бишек җыры.

-Тагын без аларга нинди сүзләр әйттек?

-Матур, ягымлы сүзләр.

-Нинди уеннар өйрәттек?

-Бармак уеннары.

 

Эшчәнлек тәмам.

Татарстан Республикасы

Мөслим районы

Мөслим авылы

 “МИЛӘШКӘЙ” балалар бакчасы”

муниципаль бюджет мәктәпкәчә белем бирү учреждениесенең

I квалификацион категорияле тәрбиячесе

МИННЕГАЛИЕВА ФИРАЗИЯ ХӘНИФ КЫЗЫ

Мәкалә ошадымы? Дусларыгызга да сөйләгез: