Сабыем

2-3 яшьлек балалар өчен

 

Т: Исәнмесез балалар!

Б: Исәнмесез!

Т: Балалар, карагыз әле, миндә нинди матур рәсем бар. Кайсыгыз белә, бу нәрсә бу?

Б: Бака.

Т: Дөрес, бу бака рәсеме. Балалар, бака нинди төстә?

Б: Яшел.

Т: Дөрес. Балалар, әйдәгез әле, без сезнең белән Роберт Батулланың бик кызыклы «Нүрбәк» әкияте белән танышып китик. Хәзер мин сезгә әкиятне укыйм, ә сез игътибар белән тыңлагыз.

 

Төп өлеш

Тәрбияче балаларга «Нурбәк» әкиятен укый.

 

Ике яшьлек Нурбәк әтисенә әйтә:

— Әти! Бака күрәсем килә, ди. Бака кайда тора ул? Әтисе Нурбәккә әйтә:

— Бака су буенда була ул,— ди.

— Су буена барыйк, — ди Нурбәк.

Әтисе белән Нурбәк су буена төшеп барганда, аларга тыкрык башында бер оя Каз очрады.

— Ка-как-ка-ка-ка-как, — ди Казлар.

— Әти, Казлар ни әйтә ул? — ди Нурбәк.

— «Нурбәк, кая барасың?» — дип сорыйлар Казлар, — ди әтисе.

— Бака карарга барам,— ди Нурбәк.

— Ка-ка-ка-как, Бакага бездән сәлам әйт! — диләр Казлар. Тыкрык уртасына җиткәч, Нурбәк белән әтисенә Бозау

очрады.

— Му-у-у! — ди Бозау.

— Әти, Бозау ни әйтә ул? — ди Нурбәк.

— «Ну-ур-бә-әк, кая барасы-ың?» — дип сорый Бозау.

— Су буена, Бака карарга-а! — ди Нурбәк.

— Бакага миннән сәлам ә-әйт! — ди Бозау.

Нурбәк белән әтисе су буена төшеп җитте. Су буенда, сөзәк ярда бик матур, ямь-яшел бер Бака утыра. Үзенчә сайрап утыра.

— Курыйк-курыйк, бака-ка, курыйк-курыйк, бака-ка!

— Әти, Бака нәрсә әйтә ул? — ди Нурбәк.

— «Исән-саумы, Нурбәк!» — дип сорый Бака,— ди әтисе.

— Исәнме, Бака! — ди Нурбәк.— Бака-бака, Бакакай, Каз­лар сиңа сәлам әйтте. 

— Бик рәхмәт, Нурбәк, — ди Бака.— Үзең дә Казларга миннән сәлам әйт.

— Бозау да сиңа сәлам әйтте, — ди Нурбәк.

— Бик рәхмәт, бик рәхмәт, — ди Бака.— Миннән дә Бозауга­ сәлам әйт.

Нурбәк белән әтисе Бака белән саубуллашып кайтып китә. Кайта торгач, алар Бозау янына җитә.

— Бозау, яшел Бака сиңа сәлам әйтте! — ди Нурбәк.

— Рәхмә-әт, — ди Бозау.

Казлар янына җиткәч, Нурбәк:

— Казлар, яшел Бака сезгә сәлам әйтте, — ди.

— Ка-как-ка-как, рәхмәт, — диләр Казлар.

 

Т: Булдырдыгыз, балалар, әкиятне игътибар белән тыңлап утырдыгыз. Әйдәгез, хәзер ял итеп алабыз?

 

Физминутка:

Бармак уеннары:

Бу бармак – бабай,

Бу бармак – әби,

Бу бармак – әти,

Бу бармак – әни,

Бу бармак – бәби,

Аның исеме – Чәнти.

 

Т: Балалар, әйдәгез, исебезгә төшереп алыйк әле, без нинди әкият укыдык?

Б: «Нүрбәк» әкияте.

Т: Дөрес. Әкияттә нинди персонажлар очырады?

Б: Нүрбәк, әти, бака, казлар, бозау.

Т: Сез барысын да дөрес әйттегез.

 

Йомгаклау

Т: Балалар, сезгә әкият ошадымы?

Б: Ошады.

Т: Әкиятне тагын укыйбызмы?

Б: Әйе.

Т: Балалар, сез барыгыз да булдырдыгыз. Әкиятне игътибар белән тыңладыгыз, сорауларга җавап бирдегез. Ә хәзергә шөгылебез тәмам.

 

Татарстан Республикасы

Мамадыш муниципаль районы

Түбән Ушма авылы

“Түбән Ушма балалар бакчасы”

муниципаль бюджет мәктәпкәчә белем бирү учреждениесенең

I квалификацион категорияле тәрбиячесе

КАШАПОВА АЛСУ СӘЛИМҖАН КЫЗЫ

Мәкалә ошадымы? Дусларыгызга да сөйләгез: